KORONADAL CITY – Nagsaka pa sa masobra 90 ka mga residente ang napilitan nga mag-evacuate matapos ang pagbaha nga nagluntad sa apat ka mga Purok sa Barangay Morales matapos nga mag-overflow ang Blook Creek bangud sa mabaskog nga pagbuhos sang ulan.
Sa interview sang Bombo Radyo Koronadal kay Barangay Kagawad Hans Avance, yara na sa Barangay Hall ang mga evacuees halin sa Purok Alegria, Purok Masagana B, Purok Tolentino kag Purok Boundary kun diin ang iban sa ila ang wala nakadala sang mga gamit sa pagbakwit.
Ginpasiguro man sangopisyal nga nahatagan na sang pagkaon, bulong kag temporaryong mabahayan ang mga apektado samtang nagapadayon ang monitoring sang Barangay Disaster Risk Reduction and Management Committee.
Sa karon, padayon ang pagpanawagan sang mga otoridad sa mga residente nga magpabilin sa seguridad kag magbantay sa posible nga pagtaas liwat sang tubig bangud sa nagapadayon nga ulan.
