Ginpasanyog ni South Cotabato Vice Governor Arthur “Dodo” Pingoy ang importansya sang mas mabaskog nga paghanda kag suporta sang gobyerno sa pag-atubang sang mga kalamidad matapos ang ikalima nga State of the Nation Address (SONA) ni Pangulong Ferdinand Marcos Jr.
Sa interview sang Bombo Radyo Koronadal kay Pingoy, iya ginpahayag nga kinahanglan padayon nga tutukan sang administrasyon ang epekto sang sunod-sunod nga kalamidad kasubong sang pagbaha kag linog nga nagahatag sang dako nga epekto sa kabuhi sang mga Pilipino.
Ginpahayag niya nga importante nga makita ang mga konkreto nga tikang sang gobyerno sa pagbulig sa mga lugar nga naapektuhan sang mga kalamidad, lakip na ang pagpalig-on sang mga programa para sa disaster preparedness kag response.
Gindugang sang bise gobernador nga kinahanglan man sang mas mabaskog nga suporta sang national government sa mga prayoridad sang South Cotabato, ilabi na sa health, education kag agriculture, nga apektado man sang mga natural nga kalamidad.
Suno kay Pingoy, dapat usisaon sang publiko kon ang mga ginpahayag sa SONA nagasabat sa aktuwal nga panginahanglan sang mga komunidad kag sa mga hangkat nga ginatubang sang pungsod, ilabi na sa pag-atubang sang mga emerhensya kag kalamidad.
