KORONADAL CITY – Liwat nga nagpaalinto ang pamunuan sang Koronadal City PNP- Traffic Section Division sa tanan nga mga motorista nga maghalong bangud nga tig-ululan naman kag madanlog ang dalanon nga masami nga mangin tunaan sang disgrasya sa dalanon.
Ini makaigad nga nakapagkit naman sang isa ka casualty ang ila nga pamunuan bangud sa aksidente sa bahin sa Purok Ilang-Ilang, Barangay Saravia, Koronadal City sa diin ginbawian sang kabuhi ang isa ka pastor matapos mabungguan ang isa ka signboard sang ginamaneho sini nga motorsiklo.
Ginkilala sang mga otoridad ang biktima nga si Wilbert Diamale, 32-anyos, kag residente sang Brgy. Bai Sarapinang, Bagumbayan, Sultan Kudarat.
Sandig sa imbestigasyon sang Koronadal City Traffic, halin sa Koronadal City ang biktima kag ginasubay sini ang kalabaon sang national highway padulong sa Davao City sakay sang motorsiklo apang pag-abot sa lugar nga ginluntaran sang insidente hinali na lamang ini nga nadulaan sang kontrol kag aksidente nga nabunggo sa sign board.
Bangud sa kabaskog sang impak, nag-angkon sang madalom nga pilas sa nagkalain-lain nga bahin sang iya lawas ang biktima.
Gilayon naman in inga gindala sa hospital para sa nagakaigo nga medikasyon apang ginbawian ini sang kabuhi.
Natalana naman nga ipaidalom sa postmortem examination ang bangkay sang nasambit nga biktima.
