Nag-umpisa na ang Philippine National Police (PNP) sang nationwide manhunt batok kay Sen. Ronald “Bato” dela Rosa kaangot sang warrant of arrest nga gin-isyu sang International Criminal Court (ICC).
Suno kay PNP chief Gen. Jose Melencio Nartatez Jr., gindeply na ang mga tracker team matapos tugutan sang Department of Justice (DOJ) ang pagpapatuman sang pag-aresto sa senador.
Ginpahayag ni Nartatez nga ginmanduan ang mga pulis nga magpatigayon sang maximum tolerance kag magsunod sa sakto nga proseso sa operasyon agud maproteheran ang mga katungod sang tanan nga imbolbado.
Dugang pa niya, kun maartestar si Dela Rosa, dayon ini nga isulod sa kustodiya sang DOJ.
Samtang, wala anay ginpahayag sang DOJ kun dayon nga dal-on si Dela Rosa sa The Hague, Netherlands, kun sa diin makita ang detention facility sang ICC.
Samtang, ginkumpirmar man sang Criminal Investigation and Detection Group (CIDG) nga yara na sa ila ang kopya sang ICC arrest warrant batok sa senador.
Nagpaandam man ang pulisya nga mahimo kasuhan sang obstruction of justice ang bisan sin-o nga magabulig ukon magabalabag sa pagpapatuman sang warrant.
Luwas sa PNP, nagpatigayon man sang separado nga operasyon ang National Bureau of Investigation (NBI) agud pangitaon ang senador.
Suno kay NBI Director Melvin Matibag, gilayon nila nga arestuhon si Dela Rosa sa tion nga matukiban nila ang lokasyon sini.
Samtang, ginpanginwala ni Sen. Robinhood Padilla ang alegasyon nga ginbuligan niya si Dela Rosa nga makaeskapo halin sa Senado.
Ginpanindugan man ni Padilla nga indi niya ginakabig nga “fugitive” si Dela Rosa kag nagapati siya nga dapat magdaug ang proseso sang layi sa Pilipinas kumpara sa international law.
