KORONADAL CITY – Nagbakwit ang yara sa 15 ka pamilya sa pagluntad sang landslide sa apat ka mga Sitio sa Bagumbayan, Sultan Kudarat.
Ini ang ginkumpirmar ni Municipal Disaster Risk Reduction and Management Officer (MDRRMO) 3 Richie Salazar sa interview sang Bombo Radyo Koronadal.
Suno kay Salazar yara sa kinse (15) ka pamilya ang nagbakwit matapos magluntad ang landslide bangud sa delikado para sa mga ini nga magtiner sa ila nga mga panimalay.
Dugang pa ni Salazar, nagluntad ang landslide matapos nga maghumok ang duta bangud sa wala untat nga pagbuhos sang ulan
Magluwas sa mga apektado nga panimalay, indi man maagyan ang dalan halin sa Barangay Poblacion padulong sa Barangay Masiag matapos matabunan sang natiphag nga duta.
Ginadumilian man ang mga residente nga nagapuyo sa nasambit nga lugar nga indi anay magbalik sa ila tagsa ka panimalay tubtob wala pa ini macheckyar sang mga otoridad.
Magapatigayon naman sang clearing operation agud nga malimpyuhan ang dalan kag liwat nga maagyan.
