KORONADAL CITY – Gindala sa balay-bululngan ang isa ka lalaki matapos nga makuryentihan samtang nagabuhos ang mabaskog nga ulan sa Balmores Street, Barangay General Paulino Santos, Koronadal City, kag may panimalay man nga natumbahan sang puno sa amo nga lugar.
Ini ang ginkumpirmar ni CDRRMO Cyrus Urbano sa interview sang Bombo Radyo Koronadal.
Suno kay Urbano, unconscious ang biktima sang gindala sang mga responders sa South Cotabato Provincial Hospital kag ginahibalo pa ang identity sini.
Samtang, padayon naman ang clearing operation sang mga otoridad sa inatumba nga puno sang kahoy sa pila ka salakyan sa Antipolo St.
Sa pihak nga bahin, ginpahayag man ni Urbano nga may pila ka panimalay sa Barangay GPS ang ginbahaan bangud sa pag-awas sang kanal sa Purok Foro malapit sa China Town, nga nagtuga sang trapiko kag nakaapekto sa mga residente.
Sa karon, nagapanawagan sa publiko ang opisyal nga maghalong sa paglabay sa mga lugar nga may kable sang kuryente kag mga puno nga ginapatihan naapektuhan sang ulan kag baha.
