Yara na sa kustodiya sang mga otoridad ang isa ka ginakabig nga street level individual matapos makuhaan sang mga indi lisensyado nga armas kag ilegal nga droga sa ginpatigayon nga search warrant operation sang kapulisan sa Sitio Buencamino, Brgy. Kapaya, Bagumbayan, Sultan Kudarat.
Ginkilala ni Police Major Arnel P Legada, hepe sang Bagumbayan Municipal Police Station ang suspek nga si alyas “Jomar”, isa ka street level individual kag residente sang nasambit nga lugar.
Suno kay PMaj. Legada, ginsalakay sang mga otoridad ang puluy-an sang suspek kun diin nakumpiska ang isa ka unit sang US Sub-machine Gun, duha ka magazine, 35 ka bala sang cal.45 kag lima ka pakete sang plastic sachet sang ginapatihan nga shahu nga may kabug-aton nga 0.369 gramo kag nagakantidad sang Php2,509.00 lakip na ang iban pa nga non-drug items.
Bangud sini, magapangatubang ang suspek sang kaso nga paglapas sa RA 10591 ukon ang Comprehensive Firearms and Ammunition Regulation Act kag kaso nga may kaangtanan sa illegal nga droga.
