Nagapadayon ang imbestigasyon sang mga otoridad sa pagpaniro-patay sa isa ka lady security guard samtang nagapahuway sa sulod mismo sang boarding house sini sa Barangay Rosary Heights 2 Cotabato City.
Ginkilala sang Cotabato City Police Office ang biktima nga si Lovely Rose Ferraren Rocaberte, 35 years old nga residente sang Barangay Nalin 2, Midsayap Cotabato.
Naguwa sa imbestigasyon sang kapulisan nga samtang yara sa sulod sang iya boarding house ang biktima ginsulod ini sang armado nga lalaki kag gintiro sang makapila ka beses.
Nakuha sa crime scene ang apat (4) ka basyo sang 45 caliber pistol.
Suno kay PNP Station 1 Commander, P/Major John Vincent Bravo, posible nga material gain ukon personal grudge ang motibo sa pagpatay sa biktima bangud nadula man ang pitaka kag cellphone sini.
Kaangot sini, nagapanawagan ang PNP sa mga nakakita sang insidente nga makig-angot sa ila agud madali nga masolbar ang krimen.
