Ginavalidate na sang Department of Social Welfare and Development Region XII ukon DSWD-XII ang kapin 31k ka potential beneficiaries sang Pantawid Pamilyang Pilipino Program ukon 4Ps sa rehiyon.
Sa interview sang Bombo Radyo Koronadal, ginpahayag ni Audrey Jane Soliva, Information Officer sang DSWD-XII, nga agud mangin kwalipikado bilang 4Ps beneficiary, kinahanglan nga yara anay ang ngalan sang pamilya sa Community-Based Monitoring System ukon CBMS nga ginapatigayon sang Philippine Statistics Authority ukon PSA.
Ginpahayag ni Solivo nga pinakamadamo sa sini ang naghalin sa probinsya sang Cotabato nga may 10,107 ka potential beneficiaries, ginasundan sang Sultan Kudarat nga may 8,790; South Cotabato nga may 6,525; kag Sarangani nga may 5,807.
Suno kay Soliva, kinahanglan man nga ma-classify ang pamilya bilang kabahin sang poorest among the poor ukon mga pinakaimol nga pamilya.
Ginatan-aw kag gina-assess sang CBMS ang nagkalain-lain nga impormasyon parte sa panimalay, lakip na ang kadamuon sang mga miyembro sang pamilya, income ukon kita, kag iban pa nga indicators nga mahimo mangin basehan sa pag-endorse sang pamilya bilang benepisyaryo sang 4Ps.
Kaangot sini, ginpahanumdom man sang DSWD-XII ang mga potential beneficiaries nga hugot nga ginadumilian ang pagprenda ukon pagpahulam sang cash card ukon ATM, ilabi na bangud ini personal nga instrumento para sa pagbaton sang benepisyo sang programa.
