Igapaidalom sa validation sang Department of Social Welfare and Development Region XII ang 417 ka benepisyaryo sang Pantawid Pamilyang Pilipino Program ukon 4Ps sa Syudad sang Koronadal sa Setyembre 16 ukon 17.
Sa interview sang Bombo Radyo Koronadal, ginpahayag ni Audrey Jane Soliva, Information Officer sang Department of Social Welfare and Development Region XII, nga padayon ang pag-validate sang ila talatapan sa listahan sang mga benepisyaryo nga ginhatag sang Philippine Statistics Authority (PSA).
Ginpahayag ni Soliva nga indi na kinahanglan nga magpalapit ang publiko sa ila barangay agud magpalista sang ila mga ngalan, bangud ang PSA na ang nagpatigayon sang proseso sa pag-identify sang mga kwalipikado nga benepisyaryo kag ang listahan nga ginavalidate sang DSWD-XII ang naghalin sa nasambit nga ahensya.
Kaangot sini, gin-awhag ni Soliva ang mga benepisyaryo nga yara ang ngalan sa listahan nga magpreparar sang mga kinahanglanon nga dokumento bilang kabahin sang validation.
Lakip sa mga dokumento nga dapat ipreparar ang National ID, birth certificate sang mga kabataan, marriage contract, kag school certificate ukon school ID bilang pamatuod nga naga-eskwela ang mga kabataan.
Kaangot sini, ginpahanumdom man ni Soliva nga kinahanglan mangin kompleto ang mga dokumento agud mangin hapos kag husto ang proseso sang validation.
