Nagpahinumdom ang Koronadal City Health Office sa publiko nga siguruhon nga limpyo kag husto ang pagkahanda sang pagkaon ilabi na subong nga nagapalapit ang selebrasyon sang Paskwa, agud malikawan ang kaso sang food poisoning.
Sa interview sang Bombo Radyo Koronadal kay Ms. Mylene Seliote, Health Education and Promotions Officer III sang Koronadal City Health Office. Ginpahayag sini nga dapat siguraduhon nga wala nakontaminar sang mikrobyo ukon kagaw ang mga pagkaon nga ginahanda kag ginkaon, bangud ini ang nagapanguna nga rason sang sakit sa tiyan kag food poisoning.
Dugang pa kay Seliote, ang husto nga pag-storage kag pagpreserba sang mga pagkaon importante agud indi ini mapan-os kag magdala sang risgo sa lawas.
Nagapanwagan man siya sa publiko nga maghagan-hagan sa pagkaon sang ginakabig nga “bawal” sa ila, agud malikawan ang bisan ano nga komplikasyon sa lawas.
