Nagpaandam ang Iran nga kabigon nila nga kaaway ang bisan ano nga pungsod nga mag-upod sa Estados Unidos sa pagpatuman sang bag-o nga sanctions batok sa ila ekonomiya.
Ini ang ginpahayag ni Mohsen Rezaei, Chief of Supreme National Security Council sang Iran, samtang nagapadayon ang tensyon sa tunga sang Iran kag US.
Ginatinguhaan man sang Egypt nga mabukwan liwat ang negosasyon sa tunga sang Iran kag US.
Nakig-negosasyon sa telepono ang foreign ministers sang duha ka pungsod kag ginhisgutan ang pagpadayon sang mga pag-istoryahanay, lakip na ang isyu sang Strait of Hormuz, isa ka importante nga ruta sang pagbiyahe sang petorlyo sa kalibutan.
Naghatag man ang Iran sang permiso sa pila ka Iraqi oil tankers nga maglabay sa Strait of Hormuz matapos ini pangayuan sang Baghdad.
Samtang, gindepensahan ni Iranian President Masoud Pezeshkian ang memorandum of understanding (MoU) nga ginpirmahan sang Iran kag US sang Hunyo, kag nagpahayag nga amo ini ang pinakamaayo nga dalan agud matapos ang ginaatubang nga krisis kag makabalik sa negosasyon.
Apang wala pa sang klaro nga kompromiso bahin sa pag-abri liwat sang Strait of Hormuz kag sa iban nga importante nga kondisyon sang duha ka kampo.
