Nangin oportunidad para sa pagpauswag sang abilidad sa pamamahayag ang COOPLympics sa syudad sang Koronadal, nga kabahin sang selebrasyon sang Cooperative Month kag gintambungan sang mga nagdaog nga campus journalist sa nagkalain-lain nga Division Schools Press Conference.
Nangin keynote speaker sa aktibidad si Kara David, isa ka batikan nga broadcast journalist, nga naghatag inspirasyon sa mga pamatan-on nga mamahayag.
Sa amo nga okasyon, ginpahanumdom ni Kyrelle Fernandez, campus journalist kag radio broadcaster sang Marbel 7 National High School, nga ang iya mga kapareho nga estudyante nga mangin responsable kag magpadayon sa paghatag sang matuod, factual kag masaligan nga impormasyon sa publiko.
Sa interview sang Bombo Radyo Koronadal, ginpahayag ni Fernandez nga importante ang campus journalism sa pagserbisyo sa komunidad paagi sa paghatag sang husto nga balita nga makadugang sa kaalam kag paghangop sang mga tawo sa nagakatabo sa ila palibot.
Dugang pa niya, apesar limitado pa ang eksperyensya sang mga campus journalist sa buluthuan kag mga paindis-indis, may daku gihapon sila nga papel sa pagpalapnag sang responsable nga impormasyon.
Gindugang man niya nga kabudlay ang pagkuha kag pagberipika sang impormasyon, ilabi na kon may daku ini nga epekto sa komunidad.
Gani, gin-agda niya ang mga estudyante nga mangin mapanilagon kag magpabilin nga matutom sa kamatuoran agud malikawan ang paglapta sang fake news. Samtang, ginpahayag ni Fernandez nga nalipay siya nga nakalip sa COOPLympics kag personal nga nabatian ang mensahe ni David.
