Ginpabugal ni U.S. President Donald Trump nga malapit na suno pa nga magbaton sang sabat ang Iran sa ginaduso nila nga peace agreement sa tunga sang duha ka partido.
Suno sa iya, ginapaabot nga pirmahan sang Iran ang nasambit nga kasugtanan sa madason nga Domingo, nga mangin una nga tikang para sa mas lapad nga kasugtanan para sa kalinong kag posible nga pagpauntat sang tensyon sa rehiyon.
Ginreport man nga ang nagapanguna nga mediator nga Pakistan nagpahayag nga ang pagpirma pagahimuon paagi sa electronic signing, bilang kabahin sang mas moderno nga proseso sang pagpirma sang kasugtanan.
Ang nasambit nga memorandum of understanding sa tunga sang Estados Unidos kag Iran ginapaabot nga magbukas sang 60-ka-adlaw nga kabanata sang negosasyon.
Sa sini nga panahon, pagahisgutan kun paano ipatuman ang nahisgutan nga framework kag kun paano masolbar ang mga nabilin nga isyu nga wala pa naresolba.
Apang bisan pa sang sini nga mga pahayag, matigdas nga ginpanginwala sang Islamic Revolutionary Guard Corps ang report kag nagsiling nga wala sang amo nga kasugtanan ukon pagpirma nga nagakatabo, nga nagapakita sang nagapadayon nga paglain sang mga pahayag sang duha ka pungsod.
