Nagdangat na sa P3 bilyon ang ginasugid nga infrastructure damage sa Cordillera Administrative Region (CAR) bangud sa asud-asud nga kalamidad nga nagresulta sa landslide kag malapnagon nga pagbaha.
Sa sulod sang sobra tatlo ka semana nga pag-ulan, madamo nga road networks sa rehiyon ang nadaot, lakip ang mga dalan nga nagakonekta sa CAR, Cagayan Valley kag Central Luzon.
Naapektuhan man ang rock netting projects sa Benguet kag iban pa nga public infrastructure.
Suno kay Department of Public Works and Highways (DPWH) Secretary Vince Dizon, posible pa nga magdako ang kantidad sang damage samtang ginapadayon ang assessment kag validation.
Bisan padayon pa ang pag-usisa, ginpasiguro ni Dizon nga may igo nga pondo angot sa gilayon nga rehabilitasyon sang mga naguba nga imprastraktura.
Prayoridad sang DPWH kag national government ang pag-ayo sang mga pasilidad agod mabuligan ang Cordillera nga makabangon sa epekto sang kalamidad.
Samtang, 15 ka indibidwal ang napatay sa bug-os nga Cordillera sa nagligad nga mga semana bangud sa rain-induced landslides.
Ginpasiguro man ni Dizon nga tutukan sang ahensya ang iban pa nga rehiyon nga nakarekord sang infrastructure damage bangud sa sunod-sunod nga kalamidad.
