Gintawag ni anay kongresista Carlos Isagani Zarate ang Bayan Muna Representative nga isa ka importante nga tikang ang pagsugod sang aktwal nga impeachment trial ni Vice President Sara Duterte matapos ang halos duha ka tuig nga delay sa proseso.
Ginpahayag ni Zarate, apesar pa nga nag-atubang sang nagkalain-lain nga kontrobersiya ang impeachment lakip na ang pagbasura sang una nga kaso sang Korte Suprema kag ang pagbag-o sang liderato sa Senado sa katapusan nagpadayon ang kaso sa impeachment court.
Dugang sini nga sa una nga adlaw sang pagbista, una nga gintutokan ang paghinun-anon sa isyu kon sin-o ang magapamuno sa impeachment court, antes ginpili bilang presiding officer si Senate President Chiz Escudero.
Sa ikaduha nga adlaw suno kay Zarate, ginpresentar sang piskalya ang ila una nga testigo nga si NBI Senior Agent John Mark Calilung nga nag-authenticate sang video sang press conference ni Vice President Duterte sang Nobyembre 23, 2024.
Nalakip sa nasambit nga video ang kontrobersyal nga pahayag sang bise presidente angut sa Presidente, First Lady, kag anay Speaker.
Samtang, sa ikatlo nga adlaw, gintutokan sang depensa ang ila cross-examination kag ang pagpresentar sang pila ka bahin sang amo man nga video agud ipakita ang bug-os nga konteksto sang mga pahayag ni Duterte.
Apang ginbuyagyag ni Zarate nga isa lang ka witness ang natapos sa tatlo ka adlaw nga hearing.
Bangud sini, nagpanawagan ini nga padasigon ang kadasigon sang trial kag likawan ang sobra nga technicalities nga mahimo magpahinay sang proseso.
Ginbalikan ni Zarate ang argumento sang depensa nga ang pahayag ni Bise Presidente Duterte isa lamang ka hypothetical ukon conditional threat.
Suno sa iya, sa idalum sang layi, ang isa ka pamahog ang mahimo sa gihapon matawag nga pamahog bisan pa nga may yara ini sang kondisyon.
Gindugang sini nga wala sang maathag kag solido nga ebidensya ang ginpakita sang depensa nga may seryoso nga pamahog batok sa bise presidente nga mahimo mahatagan sang basehan ang iya mga pahayag.
