-- ADVERTISEMENT --

Nadiskubrehan sang Department of Energy (DOE) nga 114 sa 213 ka gasoline stations nga ila gin-inspeksyon halin Nobyembre 10 tubtob 13 ang wala nagpatuman sang ensakto nga pagpanubo sang presyo sang petrolyo.

Suno kay Oil Industry Management Bureau Director Rino Abad, 97 sa mga estasyon ang personal nga gin-inspeksyon, samtang ang inspection report ginpadala na sa legal department sang DOE para sa posible nga kaso.

Ginhatagan man sang 72 oras ang mga apektado nga estasyon agud maghatag sang ila paliwanag paagi sa show cause order.

Ang iban nag-angkon nga may yara pa sila sang stocks nga nabakal sa mas mataas nga presyo.

Apang gin-insister sang ahensya nga dapat ipatuman man ang nagakaigo nga price rollback, pareho sang pagpatuman sang price increase kon nagamahal ang petrolyo.

Mahibaluan nga ang indi pagsunod sa regulasyon mahimo magresulta sa multa, pagkapriso kag posible nga suspensyon ukon pagbawi sang permit.

Samtang, nagpatuman liwat ang DOE sang pagnubo sang presyo sang petrolyo nga may bawas nga ₱1.50 kada litro sang gasolina, ₱3.80 sa diesel kag ₱5.80 sa kerosene.