Ginhilway na sang Hamas ang 3 bihag nga Israelis halin sa Gaza sa panibag-o nga hostage-prisoner swap subong nga adlaw sang Sabado, Pebrero 1, 2025.
Ini sila Yarden Bibas, 34 anyos kag Ofer Kalderon, 53 anyos nga nakalakat na sa border pabalik saila mga pamilya sa Israel kag ang US-Israeli citizen nga si Keith Siegel, 65 anyos.
Ini ang ika-apat nga batch sang mga ginpahilway nga mga bihag halin sa kamot sang Hamas halin pa nagin epektibo ang ceasefire deal sa tunga sang Israel kag Hamas sang Enero 19, 2025.
Bilang kapalit man sang pagpahilway sa mga bihag nga Israelis, nakatalana nga pahilwayon subong nga adlaw ang 183 Palestino nga nakulong sa Israel.
Masobra 100 sa ila ang halin sa Gaza kag yara 70 ang maga-atubang sa malaba ukon panghabangbuhay na sentesiyahan sa mga presihon sang Israel.
