KORONADAL CITY – Naglab-ot sa halos 20 ka mga rebel-returnees kalakip na ang isa ka platoon leader nga nagaoperar sa ilang probinsiya sang South Cotabato ang ginpresentar sa publiko sa banwa sang T’boli ,South Cotabato subong nga adlaw, Pebrero 22, 2022.
Ini ang ginpahayag ni Mayor Dibu Tuan sang banwa sang Tboli, South Cotabato.
Ang nasambit nga mga rebelde ang nagbalik sa sabak sang gobyerno bangud sa ginpasanyog nga kampanya sang MTF-ELCAC sa lugar.
Gani, hugot naman nga ginbaton sang pamunuan sang kapulisan, kasuldaduhan kag LGU-Tboli ang nasmabit nga mga rebelde.
Kalakip sa mga dinaput nga bisita sa ginpatigayon nga aktibidad sanday Police Col Nathaniel Villegas, provincial director sang South Cotabato, 1st Mechanized Brigade sang AFP sa pagpanguna ni BGen Pedro Balisi Jr. kag iban pa.
Handum suno pa sang mga ini nga magluntad ang kalinong kag katawhayan sa nasambit nga banwa rason nga boluntaryo nga nagsungka ang mga ini.
Bitbit nila sa ila pagsungka ang nagkalain-lain nga sahi sang armas luthang nga ginalakipan sang M16 RIFLE,2 GRANADE, M79, M14 RIFLE, 1-UZI, 45 CALIBER Pistol,1 SHOTGUN kag mga bala nga ila gingamit anay sa pagpakigbato sa pwersa sang gobyerno.
Suno sa panaysayon sang mga rebel-returnees, kakapoy kag mas ginpahugtan nga operasyon sang PNP kag AFP ang nagduso sa ila agud nga talikdan ang ideolohiya sang rebelde nga grupo.
Nangin madinalag-on naman ang nasambit nga seremonya sa pagpanguna sang MTF-ELCAC kun diin naghatag man sang iya mensahe kag pagpanginbulahan si DND Secretary Delfin Lorenzana.
