Wala pa sang personal nga kumpirmasyon si South Cotabato Governor Reynaldo Tamayo Jr. kon yara sa Mindanao si Senator Ronald “Bato” dela Rosa, kasunod sang mga report nga nagapanago ang senador samtang ginapangita sang mga awtoridad.
Sa interview sang Bombo Radyo Koronadal, ginpahayag ni Tamayo nga wala pa niya makita si Dela Rosa kag wala man siya sang direkta nga impormasyon nahanungod sa lokasyon sini.
Nahibaluan nga nadula sa mata sang publiko si Sen. Dela Rosa matapos maghalin sa Senate premises sa Pasay City sang kaagahon sang Mayo 14, 2026, matapos ang tatlo ka adlaw nga pagpabilin sini sa Senado sa idalom sang protective custody.
Ini kasunod sang pagpagwa sang International Criminal Court (ICC) sang arrest warrant batok sa senador may kaangtanan sa kaso nga crimes against humanity.
Tubtob subong Nobyembre 4, wala pa makumpirmar sang mga awtoridad ang eksakto nga nahamtangan ni Dela Rosa, apesar padayon ang pagpangita sa iya kag may yara na sang P50-million reward para sa impormasyon nga magatudlo sa iya pagkadakop.
Suno kay Tamayo, to see is to believe bangud kinahanglan niya mismo makita ang senador antes makahatag sang kumpirmasyon kon yara ini sa Mindanao.
