Posible nga magsaka ang sukot sa kuryente bangud sa padayon nga pagluya sang piso kontra dolyar, nga nagapamahal sang imported fuel nga ginagamit sa paghimo sang elektrisidad, suno kay Energy Secretary Sharon S. Garin.
Suno kay Garin, ang pagsaka sang gasto sa imported coal, diesel kag liquefied natural gas (LNG) mahimo magresulta sa mas mataas nga bayranan kada kilowatt-hour sang mga konsumidor.
Sang Martes, nagsira ang piso sa rekord nga pinakamababa nga ₱64.17 kada dolyar, halin sa nauna nga rekord nga ₱63.95 sang Lunes.
Bangud nagasalig ang Pilipinas sa importasyon sang fuel, mas madamo nga piso ang kinahanglan sang mga kompanya agud mabayaran ang ila mga ginabakal sa abroad.
Samtang, nagaplano ang Department of Energy (DOE) nga makig-angot sa Energy Regulatory Commission agud usisaon ang mga tikang nga makapahagan-hag sa epekto sang nagasaka nga gasto.
Dugang nga kabudlayan ang ginapaabot bangud sa mabaskog nga El Niño nga mahimo magpamenos sang suplay sang tubig kag makaapekto sa paghimo sang kuryente halin sa hydropower.
Ginpaathag man ni Garin nga mahimo hangyuon sang gobyerno ang mga kumpanya sang petrolyo nga ipatuman sa nagkalainlain nga tion ang posible nga pagsaka sang presyo sang petrolyo.
