Nagatinguha ang kampo depensa ni anay Presidente Rodrigo Duterte nga makahatag sang kaugalingon nga opening statement sa pagsugod sang iya trial sa International Criminal Court (ICC), ilabi na parte sa karakter kag kasamtangan nga kondisyon sang akusado.
Ini ang ginpahayag ni lead defense counsel Peter Haynes sa ika-lima kag katapusan nga status conference antes magsugod ang trial ni Duterte sa kaso nga crimes against humanity sa Nobyembre 30.
Sa hearing, gin-istoryahan sang Trial Chamber III ang mga opening statement sang prosecution kag sang Common Legal Representatives of the Victims ukon mga abogado nga nagarepresentar sa mga biktima.
Gin-usisa ni Presiding Judge Joanna Korner kun handa bala ang depensa nga magpresentar sang outline sa korte kag publiko parte sa ila estratehiya sa pagdepensa kay Duterte.
Sabat ni Haynes, magapasa sila sang ila pormal nga posisyon sa masunod nga mga inadlaw, apang posible nga maghambal siya sa pagsugod sang trial agud talakayon ang karakter kag kahimtangan sang anay presidente.
Suno naman kay Atty. Kaiser Cordero, Founder and Chief Executive Officer sang Cordero and Associates nga nagtambong sa status conference sa The Hague, Nobyembre 30 pa mahibaluan kun pagahatagan sang korte sang pag-uyon ang request sang depensa.
Dugang pa ni Cordero, ginahingyo man sang kampo ni Haynes nga tugutan sila nga makauna sa paghatag sang opening statement antes sa prosecution, bisan pa nga suno sa ICC Rules on Procedure and Evidence, ang prosecution ang una nga nagapahayag sa korte sa sini nga bahin sang paglilitis.
Ang katapusan nga status conference amo ang katapusan nga preparatory hearing sang mga partido antes magsugod ang aktuwal nga trial. Wala nagtambong si Duterte sa sini nga hearing matapos nga gin-waive niya ang iya kinamatarong nga personal nga magtambong, kasunod sang iya presensya sa ikatlo kag ikaapat nga status conference.
Ang status conference ginahiwat sa pagtalakay sang mga legal nga butang, iskedyul kag iban pa nga preparasyon agud masiguro nga handa ang tanan nga partido antes magsugod ang pormal nga paglilitis.
