Kasamtangan nga yara sa red alert ang Bureau of Fire Protection (BFP) Koronadal bilang kabahin sang ila preparasyon para sa nagahilapit nga Todos los Santos kag Pista Minatay sa Nobyembre 1 kag 2.
Sa interview sang Bombo Radyo Koronadal kay FO1 Jane Cura, Fire Operation Safety sang BFP Koronadal, iya ginpahayag nga padayon ang preparasyon sang ahensya agud masiguro ang kaluwasan sang publiko sa tion sang pagbisita sa mga sementeryo.
Suno kay FO1 Cura, duha ka semana antes ang Nobyembre 1 kag 2, nakahanda na ang deployment plan sang ahensya para sa pagmonitor kag pagbantay sa mga sementeryo nga ginapaabot nga kadtuan sang madamo nga pamilya nga magadumdom sa ila mga minatay.
Kaangot sini, nagpanawagan man ang BFP Koronadal sa publiko nga mangin responsable sa paggamit sang mga kandila kag likawan nga bayaan ini nga nagasiga nga wala sang nagabantay, agud malikawan ang posible nga pagdabdab sang sunog.
Ginpaandaman man sang ahensya ang publiko nga likawan ang pagsunog sang basura, ilabi na sa mga lugar nga wala sang nagakaigo nga seguridad kag malapit sa mga butang nga madali magkalayo.
Bangud sini, ginpahanumdom ni FO1 Cura ang tanan nga maghalong sa paggamit sang kandila kag sa pagdumala sang basura.
Gin-awhag man niya ang publiko nga gilayon nga magreport sa BFP sa tion sang emerhensya ukon sunog agud madasig nga makaresponde ang mga bombero.
