Gindala sa balay-bulongan ang isa ka 70-anyos nga babayi matapos maglain ang iya pamatyag kag nalipong samtang yara sa sulod sang public cemetery sa Koronadal City sang Oktubre 31. Ini ang ginpahayag ni Fire Officer 2 Darryl Jade B. Cabangal sang Operations Section sang Bureau of Fire Protection (BFP) Koronadal sa interview sang Bombo Radyo Koronadal.
Suno kay Cabangal, nagreklamo ang senior citizen sang pagkalipong kag pagsuka gani gilayon ini nga gin-asistihan sang naka-deploy nga BFP personnel kag gin-check ang iya blood pressure.
Matapos ang inisyal nga pag-assess, gindala ang babayi sa balay-bulongan agud masiguro ang iya kahimtangan kag mahatagan sang nagakaigo nga medical attention. Samtang, ginpahayag ni Cabangal nga wala na sang iban nga untoward incidents nga na-record sa ila monitoring sa mga sementeryo.
Ginapanawagan naman sang BFP ang publiko, ilabi na ang mga senior citizen, nga magdala sang ila maintenance medicines, magpahuway kon ginakapoy ukon nagabatyag sang kalipong, mag-inom sang bastante nga tubig kag maglikaw sa malawig nga pagbulad sa init agud malikawan ang heat-related illnesses kag iban pa nga medical emergencies.
