Padayon ang ginahimo nga imbestigasyon sang mga otoridad angot sa pagpangluthang patay sa isa ka tricycle driver kag ang iya pasahero sa Aparente kag Salvani Streets, Barangay City Heights, syuad sang Gensan kahapon nga adlaw sang Lunes, Pebrero 2, 2026 .
Ginkilala ang mga biktima nga sanday Iven Conde, 33 anyos, residente sang Barangay Mabuhay, nga amo ang driver sang tricycle, kag Nhiezer Aguacito, 24 anyos, isa ka temporaryo nga residente sang Oringo, City Heights.
Sandig sa imbestigasyon, samtang gina dul-ong sang driver ang biktima, hinali sila nga gin harangan kag gin himo ang pagpangluthang.
Gilayon nga gindangat sa malapit nga balay bololngan si Conde apang wala na siya makaluwas.
Samtang si Aguacito naman, ang pasahero nga isa ka nurse, pauli na tani apang na imbolbar ini sa insidente sang pagpangluthang kag gilayon man nga nadulaan sang kabuhi. Base sa pahayag sang iloy sang driver nga biktima, ginkakibot niya ang natabo kag dako nga palaisipan sa iya bangud wala man sila sang kontra.
Sa subong, padayon nga ginapanawagan sang kapulisan ang bisan sin-o nga may impormasyon nga magpalapit agud makabulig sa imbestigasyon.
Suno sa mga otoridad, ang insidente nagapakita sang dako naman nga kabalaka sa kaluwasan sang publiko sa City Heights sa General Santos City.
