Gin-arestar ang rapper nga si Kodak Black sa Florida bangud sang kaso nga drug trafficking nga may kaangtanan sa ecstasy.
Ginpriso siya sa Orange County Jail matapos maaresto kag makuhaan sang pink nga bag nga ginabanta may sulod nga ecstasy, $37,000 nga cash ukon masobra ₱2.07 milyon, kag mga dokumento nga may iya pangalan sa sulod sang isa ka Lamborghini SUV sa Orlando.
Suno sa mga otoridad, ang kaso nag-umpisa matapos ang insidente sa komunidad nga ginreport nga may nabatian nga lupok sang pusil, nga nagdala sa pagresponde sang mga pulis kag pag-imbestigar sa mga parked luxury vehicles sa area.
Sa korte, nagpahayag ang rapper nga nagapangalang si Bill Kapri sang “not guilty” plea kag naghangyo sang jury trial.
Ginbutangan siya sang $75,000 ukon ₱4.2 million pesos nga piyansa samtang ginahulat ang sunod nga hearing.
Madumduman nga may nagligad na siya nga mga kaso nga may kaangtanan sa droga kag armas-luthang.
