Ginpahayag sang Bangon Sambayanan nga mga propaganda, insinuation, kag indirect accusations ang estratehiya sang House prosecution batok sa depensa sa nagapadayon nga impeachment trial may kaangtanan sa isyu sang confidential funds.
Sa interview sang Bombo Radyo Koronadal kay Secretary General Jeffrey “Ka Eric” Celiz sang Bangon Sambayanan, ginpahayag niya nga indi lang ang resulta sang audit sang Commission on Audit (COA) ang dapat tan-awon sa pag-usisa sang paggamit sang confidential funds, sa baylo kinahanglan man ang input sang mga eksperto sa intelligence kag national security.
Suno kay Celiz, may mandato ang COA sa pag-audit sang pondo sang gobyerno, apang ang paggamit sang confidential funds sa sensitibo nga operasyon kinahanglan man masabtan paagi sa panan-aw sang mga may eksperyensya sa intelligence work.
Ginpaathag niya nga ang findings sang COA indi pa dapat kabigon nga pinal nga pamatuod sang iregularidad bangud mahimo pa ini ma-review ukon maapelar suno sa yara nga proseso.
Gindepensahan man ni Celiz ang paggamit sang mga alyas ukon code names sa intelligence operations, nga suno sa iya, isa ini ka normal nga pamaagi agud maproteheran ang identidad sang mga informant kag assets.
Para sa iya, indi dapat dayon kabigon nga anomalya ang paggamit sang code names tubtob nga mapamatud-an nga wala sang lehitimo nga operasyon ukon intelligence-related nga aktibidad.
