Ginpahayag ni United States President Donald Trump nga temporaryo niya nga ginpauntat ang pagpatuman sang pila ka sanctions batok sa Russia agud mapabilin ang Moscow sa negosasyon kag mapadayon ang mga panikasog nga tapuson ang inaway sa Ukraine.
Ginpahayag ni Trump nga indi niya luyag maghimo sang mga tikang nga mahimo magtulod sa Russia nga mag-atras sa negosasyon.
Suno kay US Secretary of State Marco Rubio, 60-adlaw ang temporaryo nga suspensyon agud matun-an ang epekto sang sanctions sa ekonomiya sang Estados Unidos kag sang kalibutan.
Ginkabig ni Russian envoy Kirill Dmitriev nga makasaysayan ang desisyon, samtang ginpaandam ni Ukrainian President Volodymyr Zelensky nga mangin “maragtas nga sala” kun magpabor ang Estados Unidos kay Russian President Vladimir Putin.
Gin-akusahan ni Trump si Zelensky nga wala sang handum nga magatakop ang kinagamo, apang ginpamatud-an sang lider sang Ukraine nga luyag niya ang kalinong kag ginatudlo si Putin nga wala sang sinsero nga handum sa pag-untat sang inaway.
Ginkwestyon man sang Ukraine kag sang mga alyado sini sa Europe ang plano sang Estados Unidos nga mag-import sang diesel halin sa Russia, nga suno kay Zelensky mahimo maghatag sang dugang nga pondo sa Moscow.
Padayon man ang Russia sa pag-eksport sang petrolyo sa China kag India bisan pa sang mga internasyonal nga sanctions.
Samtang, nagdugang ang kabalaka sang Ukraine bahin sa suporta sang Estados Unidos matapos ang mga problema sa Starlink, nga ginagamit sang militar sang Ukraine.
Ginpanginwala ni Trump nga hungod nga ginpahinay ang koneksyon kag gin-untat ang pagpaambit sang intelligence information.
Sa karon, indi pa sigurado kun ano ang epekto sang suspensyon sang sanctions sa negosasyon kag sa relasyon sang Estados Unidos, Russia kag Ukraine.
