Malampuson nga gin hiwat sang Bombo Radyo Philippines Foundation, Inc. kag ang Philippine Red Cross ang nagdumalahan sang Dugong Bombo 2025, ang pinakamalapad nga single-day voluntary bloodletting event sa pungsod.
Ginpatigayon ini nga dungan sa 25 ka key areas sa bilog nga Pilipinas, upod ang 32 ka fully digitalized AM kag FM stations sang network.
Sa tunga sang kalain nga gin-gwa sang mga mabaskog nga bagyo kag mabaskugon nga linog nga nagigo sa pila ka rehiyon, nalampuwasan sang Dugong Bombo subong nga tuig ang record sang nagligad nga tuig.
Liwat sini nga ginpabakod ang kusog, pagpakig-upod, kag espiritu sang boluntaryo nga pagbulig sang pumuluyo nga Pilipino.
Nag-abot sa 4,657 ka bag sang dugo ang nakolekta, nga katumbas sang 2,095,650 cc, 2,095.65 ka litro, ukon 553.61 ka galon, ukon malapit 10 ka drum sang dugo nga makasalbar sang kabuhi.
Sa tunga sang pagpangabudlay sang pungsod nga magbangon batok sa mga kalamidad, nag-angkon sang mas lawig kag mas madalom nga kahulugan ang sini nga tinuig nga aktibidad.
Mga Pilipino halin sa nagkalain-lain nga sektor—mga estudyante, manugobra, unipormado nga personahe, mga propesyonal, kag mga komunidad—naghatag sang ila dugo sa tunga sang mabudlay nga panahon. Ang ila pag-iswag kag pagpakigbahin nagapakita sang mabakod nga espiritu sang bayanihan nga nagapadayun nga nagapakita sang pagkatawo sang Pilipino.
Sa lapit duha ka dekada, ang Dugong Bombo nangin isa ka importante nga lifeline para sa mga komunidad sa bilog nga kapuluan.
Tinuig-tinuig, linibo ka units sang dugo ang naihatag agud masuportahan ang mga pasyente sa tion sang emerhensya, pagpanganak, operasyon, pagpabulong sa kanser, kag iban pa nga kritikal nga medical nga kinahanglanon.
Sa tema nga “A Little Pain, A Life to Gain,” ginapabutyag sang programa nga bisan pa nga pila ka minutos lang kag gamay nga kasakit ang madangatan sa paghatag sang dugo, ini makahatag sang isa pa ka kahigayunan sa kabuhi sang isigkatawo nga Pilipino.
Bisan pa sa presensya sang modernong teknolohiya sa medisina, wala sing kapuli ang dugo sang tawo, gani ang mga boluntaryo nga donor isa ka importante nga kabangdanan sa pagluwas sang kabuhi.
Nagpahayag sang bug-os nga suporta ang Catholic Bishops’ Conference of the Philippines (CBCP) para sa Dugong Bombo 2025.
