Ginabantayan na sang Department of Energy ukon DOE ang posible nga epekto sang mabaskog nga El Niño sa suplay sang kuryente sa bug-os nga pungsod, ilabi na sa Luzon, Visayas, kag Mindanao.
Suno sa ahensya, ginapreparar na ang mga pasilidad sang kuryente kag nagahimo sang serye sang mga simulation agud matun-an ang posible nga kakulangan sa suplay sa pag-abot sang tuig 2027.
Paagi sini, mahibaluan ang nagakaigo nga mga tikang agud malikawan ang mas grabe nga problema sa kuryente.
Indi man ginadula sang DOE ang posibilidad nga magsaka sa red alert ang Luzon Grid kun maglala pa ang epekto sang tag-ilinit sa sektor sang enerhiya.
Apang, ginatun-an sang ahensya ang mga pamaagi agud malikawan ang malapad kag malawig nga brownout sa mga panimalay.
Sa pihak nga bahin, bisan manubo ang posibilidad nga mag-abot sa yellow alert ang Mindanao Grid, ginapaabot gihapon nga mahimo ini mag-angkon sang red alert sa katapusan nga quarter sang 2027.
Samtang, ang Visayas Grid ang ginapaabot nga pinakaapektado sa pagnipis sang suplay sang kuryente.
Bangud sini, ginabantayan sang DOE ang sitwasyon kag ginaplano ang pagbutang sang battery energy storage system kag power barge sa Visayas sa una nga quarter sang 2027 agud mapalig-on ang suplay sang kuryente kag malikawan ang mas malala nga kakulangon.
Padayon naman nga ginamonitor sang gobyerno ang sitwasyon agud masiguro ang masaligan nga suplay sang kuryente sa tunga sang posible nga epekto sang El Niño.
