Gin-flag sang Commission on Audit (COA) ang Department of Education (DepEd) bangud sang mga issue sa P5.69 billion nga School Based Feeding Program (SBFP) sa final year ni Vice President Sara Duterte bilang secretary.
Base sa annual audit report sang COA sa 2023, nakit-an sang state auditors nga 21 ka School Division Offices (SDOs) ang nag-report sang atrasado nga pagpatuman sang regular kag milk feeding components.
Lakip sa mga tinutuyo sang SBFP amo ang paghatag sang nourishment para sa growth kag development sang intended learners kag magbulig sa pag-boost sang ila immune system.
May duha ini ka components nga mabaton sang tanan nga benepisyaryo: ang regular nga component sang hot meals kag milk component (pasteurized/sterilized milk good for 33 feeding days).
Apang sa DepEd offices sa Metro Manila, Central Luzon kag Northern Mindanao, may nakit-an nga issues ang state auditors sa kalidad, packing kag expiration sang pila ka gin-deliver nga food items.
Suno sa Aurora SDO, may nakit-an nga peste kag insekto sa sulod sang Karabun ukon milky buns kag squash nutribuns nga para sa mga estudyante.//Sa Bulacan, gin-report man sang division ang dunot, hilaw ukon crushed food items sa pila ka gin-deliver sa ila. Gin-cite man sa report nga Bulacan kag Meycauyan City bangud nga wala nagpatuman sang adlaw-adlaw nga feeding activities.
Sa Misamis Oriental, 1, 001 nga E-Nutribun ang gin-deliver nagikan sa Setyembre 2023 tubtob sa Enero 2024 ang ginbalik sa suppliers agud islan bangud nga may agup-op ukon molds kag naglain na ang color isa tubtob duha ka adlaw antes ang expiration.
Ang iban nga mga item ang gin-deliver nga indi na maayo ang kondisyon bangud sang packaging issues.
Natukiban man nga ang mga estudyante nga dapat nga magbaton sang nutribuns ang indi available ukon absent, gani ginhatag nalang sa iban nga learners. Ginpa-athag sang mga manunudlo ang amo nga desisyon kag gintumod ang spoilage concerns.
Sa Iligan SDO naman, wala nagasanto ang expiry dates. Indi man mabasahan sang maayo ang manufacturing date.//May nakit-an man nga issues sa implementation sa Quezon City SDO.
Makita man nga wala nakabaton sang gatas sa nagaka-igo nga tion ukon wala gid ang 21 ka SDOs: Mandaluyong City, Pasig City, Ifugao, Baguio City, Benguet, La Union, Oriental Mindoro, Palawan, Camarines Sur, Zamboanga City, Bukidnon, Valencia City, Malaybalay, Tagum City, South Cotabato, Sultan Kudarat, Agusan del Norte, Butuan City, Cabadbaran City, Surigao City kag Surigao del Norte.
Sa bahin sang DepEd, ginpahayag sini nga nagmandu na sila sang inspection agud nga magpatigayon sang ocular inspection sa food preparation site sang supplier sa mga tinapay nga may insekto.
Sa isa ka House budget hearing, ginpakamalaot sang mga mamalidha ang findings sang COA sa DepEd kag gintawag nga “unacceptable.”
Nagpanawagan man sila sang imbestigasyon sa lapses, lakip na ang possible nga pag-blacklist sang pasaway nga suppliers.
Bukas naman si DepEd Secretary Sonny Angara sa amo nga suhestiyon agud nga ipakita sa suppliers nga indi nila mahimo nga mapaslaw ang gobyerno.
