Mas mataas na audit requirements ang ipatutupad ng Securities and Exchange Commission (SEC) sa mga kumpanyang may malalaking kontrata sa pamahalaan, bilang bahagi ng pagpapalakas sa financial transparency at pagsusuri sa paggamit ng pondo sa mga proyekto ng gobyerno.
Sa ilalim ng SEC Memorandum Circular No. 26, Series of 2026, binago ng regulator ang accreditation rules para matiyak na masusing nasusuri ang financial records ng mga kumpanyang may malalaking government contracts.
Sakop ng bagong requirement ang mga kumpanyang may isang kontrata sa gobyerno na lampas P750 milyon, o may pinagsama-samang government contracts na higit P1 bilyon. Kailangan nilang kumuha ng Group A accredited independent external auditor.
Para naman sa mga kumpanyang may government contracts na nagkakahalaga ng P400 milyon hanggang P750 milyon, kinakailangan ang Group B accredited auditor para sa pagsusuri ng kanilang financial statements.
Bukod sa mas mataas na antas ng external audit, kailangan din ng mga korporasyong sakop ng bagong patakaran na magsumite ng notarized schedule ng kanilang mga proyekto.
Dapat nakasaad sa dokumento ang detalye ng bawat proyekto, halaga ng kontrata at kasalukuyang status nito, na isasama bilang bahagi ng mga dokumentong sakop ng opisyal na audit report.
Inaasahang magbibigay ang mga bagong requirement ng mas detalyadong financial trail para sa malalaking government contractors, lalo na sa gitna ng mas pinaigting na pagsusuri sa mga kontrobersiya kaugnay ng flood control projects.
Magsisimulang ipatupad ang mga bagong alituntunin para sa financial statement audits na tumutukoy sa mga fiscal period na magtatapos sa o pagkatapos ng Hunyo 30, 2027.
