Padayon ang operasyon sang ahensya agud magdul-ong sang bulig kag suporta sa mga apektado sang pagtay-og sa Mindanao sang nagligad nga Lunes.
Ini ang nangin pahayag ni Regional Director Loreto Cabaya Jr. sang Department of Social Welfare and Development Region XII, sa exclusive interview sang Bombo Radyo Koronadal.
Suno sa direktor, padayon kag wala nagauntat ang ahensya sa pagdul-ong sang bulig kag relief assistance sa mga benipesyaryo nga apketado sang pagtay-og sa bug-os nga rehiyon.
Gindugang pa ni Cabaya nga padayon ang pagpakig-angot sang ila talatapan sa mga Local Government Units sang nagkalain-lain nga komunidad para sa mas hapsay kag organisado nga pagpanagtag sang ayudad.
Suno sa iya, nagahatag sang listahan ang kada barangay sa ila agud ila chekyaron kag beripikahon.
Gindugang pa sang direktor nga agud malikawan ang pagdinasok sang mga pumuluyo, naga-house to house na lang ang mga katapo sang ahensya agud mangin madali para sa mga benepisyaryo ang pagbaton sang mga ayuda.
Sa karon, yara na sa masobra 60,000 ka mga indibidwal ang nabuligan sang ahensya kag ginpasiguro ni Cabaya nga padayon ang ila pagpakig-angot sa mga lokal nga panguluhan sa rehiyon ilabi na ang mga isolated areas agud mapalab-otan sang bulig.
