Ginapaandam sang Convergence of Initiatives for Environmental Justice (CIEJ) ang posible nga aftermath sang pagmina sa Tampakan, ilabi na ang daku nga paggamit sang tubig.
Sa interview sang Bombo Radyo Koronadal kay Rene Pamplona, iya ginpahayag nga mahimo ini makaapekto sa suplay sang tubig nga mas kinahanglan sang mga mangunguma para sa rice production.
Ginpaathag niya nga importante nga tutukan ang epekto sang proyekto sa pangabuhian kag agrikultura sa lugar.
Dugang pa ni Pamplona nga isa ang Tampakan sa mga banwa nga may dako nga kontribusyon sa produksyon sang humay sa South Cotabato.
Ginabulubanta nga nagaabot sa P1.6 bilyon kada tuig ang balor sang humay nga ginaproduce sa Tampakan, ukon yara sa 75 milyones ka kilo.
Gani, ginaduso ni Pamplona nga konsiderahon ang posible nga epekto sang mining operation sa padayon nga produksyon sang humay.
Para kay Pamplona, dapat mahatagan sang nagakaigo nga pagtagad ang posible nga long-term nga epekto sang pagmina sa agrikultura kag pangabuhian sang mga residente.
Bangud sini, mabaskog nga ginpamatukan ni Pamplona ang mining operation sa banwa sang Tampakan kag ginpanawagan nga indi pagibaylo ang natural resources kag rice production sang Tampakan sa makahalit nga pagmina.
