Padayon ang koordinasyon sang Commission on Elections (COMELEC) Koronadal sa City Environment and Natural Resources Office (CENRO) agud masiguro nga mahatagan sang husto nga aksyon ang mga reklamo kag report may kaangtanan sa mga paglapas sa guidelines sang COMELEC, partikular na sa kampanya sang mga kandidato kag ila mga supporters.
Ini ang nangin pahayag ni Atty. Maleiha Usman-Loong, Election Officer Koronadal City sa interview sang bombo radyo Koronadal.
Suno sa iya, bukas ang ila opisina sa CENRO sa pag-monitor kag pagrekord sang mga election-related violations, labi na gid ang iligal nga pagtapik sang campaign posters, streamers, kag iban pa nga election paraphernalia sa mga lugar nga ginadumilian sang COMELEC.
Ginpaathag ni Atty. Usman-Loong nga ginatugutan lamang ang pagbutang sang campaign materials sa mga “common poster areas” ukon mga lugar nga opisyal nga gin-designate sang COMELEC para sa kampanya.
Apang may mga kandidato kag supporters nga naglapas kag nagbutang sang ila mga materyales sa mga lugar nga indi ginatugutan, kalakip na ang mga kahoy, poste sang kuryente, kag pader sang pribado ukon pampublikong mga istruktura sa diin may listahan na sang mga ini ang City Environment and Natural Resources Office.
