Posible nga magnubo sa P80 tubtob P60 kada litro ang presyo sang diesel sa Probinsya sang South Cotabato sa tion nga mag-abot ang gin-import nga suplay halin sa Malaysian company, suno kay Gov. Reynaldo Tamayo Jr. – Governor, Probinsya sang South Cotabato.
Ginpahayag sang gobernador nga ginahulat na lang sang probinsya ang pagkumpleto sang mga kinahanglan nga mga dokumento antes mahatag ang produkto sa probinsya.
Bangud sini, nagpaalinton si Tamayo sa mga kumpanya sang petrolyo sa probinsya nga mag-umpisa na sila sa pagpanubo sang presyo sang gatong bangud pagasiguraduhon niya nga magnubo pa sang dugang nga P30 ang presyo sang gatong sa probinsya.
Madumduman nga una na nga ginpahayag sang gobernandor may nakatala nga 120 milyon nga litro sang suplay sang gatong ang ginalauman nga maga-abot sa probinsya pinaagi sa pagpakig-angot sa mga pribado nga sektor.
Dugang pa ni Tamayo, target sang provincial govenrment nga mag-abot ang una nga stock sa sulod sang 15 ka adlaw, ukon sa una nga semana sang Mayo 2026.
