Nagdul-ong sang bulig ang aktres kag host nga si Kim Chiu sa mga traysikad drivers bilang kabahin sang selebrasyon sang iya kaadlawan, sa diin nagpanghatag ini sang libre nga gatong kag grocery packs sa mga stranded drivers.
Sa iya post sa social media, ginpaambit ni Kim ang simple nga mensahe: “Birthday charity sa mga jeepney kag tricycle drivers!” samtang mas madamo pa nga mga litrato kag istorya sang mga nakabaton sang ayuda ang nagtuhaw halin sa mga netizens.
Indi ini bag-o para sa aktres, nga kilala sa iya tuigan nga mga inisyatibo sa charity sa tion sang iya mga kaadlawan.
Una na man ini nga nagbulig sa mga Aetas sa Zambales kag naghatag sang construction materials sa mga biktima sang pagtay-og sa Cebu sang nagligad nga tuig.
Madamo sa mga nakabaton sang ayuda ang nagpabutyag sang ila pagpasalamat, nga nagasiling nga ang simple nga suporta sang aktres ang may dako nga bulig ilabi na sa tunga sang padayon nga pagsaka sang presyo sang gatong kag mga kabudlayan nga gina-atubang sang mga drivers sa pungsod.
Samtang, nangin emosyonal man si Chui sa iya birthday celebration kun sa diin ginpakigbahin niya ang iya birthday wish para sa “ultimate happiness” kag nagpasalamat sa iya mga fans kag pamilya sa padayon nga suporta.
