Padayon ang preparasyon sang Commission on Elections (COMELEC) para sa una nga BARMM Parliamentary Elections nga natalana sa Setyembre 14, 2026, matapos magpatigayon sang high-level security conference ang pamunuan sang COMELEC sa Bangsamoro Autonomous Region in Muslim Mindanao (BARMM).
Kalakip sa pagsinapol sanday COMELEC Chairman George Erwin Garcia, COMELEC Regional Director for BARMM Atty. Ray Sumalipao, mga opisyal sang Western Mindanao Command (WestMinCom), kag Philippine National Police-BARMM agud mapabakod ang seguridad kag koordinasyon antes, sa tion, kag pagkatapos sang eleksyon.
Sa nasambit nga conference, ginpaguwa man sang COMELEC ang listahan sang mga Election Areas of Concern ukon election hotspots sa rehiyon.
Dose ka mga munisipyo ang gin-classify sa Red Category bangud sang record sang election-related violence kag presensya sang mga armado nga grupo nga mahimo makaimpluwensya sa malinong kag patas nga eleksyon.
Nagalakip ini sang anum ka banwa sa Lanao del Sur—Lumba-Bayabao, Masiu, Mulondo, Poona Bayabao, Tamparan kag Taraka; lima ka banwa sa Maguindanao del Sur—Buluan, Datu Paglas, Mangudadatu, Paglat kag Pandag; kag ang banwa sang Al-Barka sa Basilan.
Sa pihak sini, ginpasiguro sang Armed Forces of the Philippines kag Philippine National Police nga nakapreparar na ang ila mga pwersa sa pagpatuman sang nagakaigo nga security measures agud masiguro ang malinong, hapsay kag kredible nga pagpatigayon sang pinakauna nga BARMM Parliamentary Elections.
