-- ADVERTISEMENT --

Ginakabig nga mas malapad nga oportunidad sa merkado ang 40 ka weaving communities halin sa nagkalain-lain nga bahin sang Pilipinas paagi sa Habi Textile Bazaar nga kabahin sang mga aktibidad sang Department of Science and Technology–Philippine Textile Research Institute (DOST-PTRI) sa SOCCSKSARGEN Region.

Sa interview sang Bombo Radyo Koronadal, ginpahayag ni Ms. Evangeline Flor Manalang, Officer-in-Charge sang Office of the Director sang DOST-PTRI, nga nagatuyo ang mga aktibidad nga kilalahon ang mga local waiver kag mapauswag ang tradisyonal nga industriya sang panapton.

Lakip sa mga aktibidad ang Weaver’s Night sa South Cotabato Gymnasium and Cultural Center kag Telakbay sa Lake Sebu kag Polomolok, South Cotabato, kun sa diin makilala sang mga bisita ang nagkalain-lain nga weaving institutions kag ang proseso sang paghimo sang T’nalak cloth. Tampok man ang Tatabi: Handumanan Philippine Iconography sa Robinsons GenSan nga magapakita sang mga obra sang Filipino designers nga nagahiusa sang tradisyon kag moderno nga textile design.

Samtang, ipakita kag ibaligya sa Habi Textile Bazaar ang nagkalain-lain nga produkto, lakip ang Inabel halin sa Rehiyon sang Ilocos, Hablon halin sa Probinsya sang Iloilo kag tradisyonal nga mga tela halin sa Mindanao.

Suno kay Manalang, indi lamang ini paagi sa pagpreserbar sang kultura kag tradisyon sang weaving kundi oportunidad man nga mapalapad ang merkado kag pangabuhian sang mga local weaver.

Gin-awhag niya ang publiko, ilabi na ang mga pumuluyo sang SOCCSKSARGEN, nga suportahan ang mga aktibidad kag magbakal sang lokal nga woven products agud mabuligan ang pagpadayon sang industriya sang weaving sa Pilipinas.