KORONADAL CITY – Ginsalakay sang delivery wing van ang tent assembly sang naga-check point nga kapulisan sa boundary sang Barangay Saravia, Koronadal City kag Barangay Palian, Tupi, South Cotabato.
Ini ang ginpahayag ni Police MSgt. Leo Dimaculangan, traffic investigator sang Koronadal City PNP sa interview sang Bombo Radyo Koronadal.
Suno kay Dimaculangan pasado alas-5 sang kaagahon nagluntad ang aksidente kun diin nawasak ang tent sang 1st Police Mobile Force Company 3rd Platoon sa nasambit nga lugar.
Isa ka wing van nga puti nga may plate number 10110 ang nagbunggo sa tent nga ginamaneho ni Oliver Malla nga residente sang Davao City.
Naguwa sa imbestigasyon nga ginapanag-iyahan sang Magnas Spectra Corporation nga naka-base sa Davao City ang nasambit nga salakyan.
Dugang pa ni Dimaculangan, matapos mabungguan sang driver sang tent nagpalagyo ini apang na-trace gihapon sang mga otoridad matapos nga magdeliver ini sa isa ka commercial establishment sa Koronadal.
Apang, nagsungka ini sa kapulisan sa siyudad sang Davao kag nakahanda nga makig-settle sa 1st SPMFC 3rd platoon sa damyos nga gintuga sang pagsalakay sini.
Natulugan suno pa ang driver sang wing van rason nga wala sini matalupangdan ang check point apisar pa nga kumpleto man sa blinker.
Nahibaluan nga magluwas sa naguba nga tent, nadalasa kag naguba man ang CCTV camera nga naka-attach sa tent.
Wala naman sang may napilasan sa nasambit nga disgrasya.
Kaangot sini, liwat naman nga nagpahanumdom ang opisyal sa mga driver nga maghalong sa pag-maneho kag sa tion nga ginatuyo magpahuway anay agud malikawan ang disgrasya.
