Matigdas nga ginpanginwala ni Senate Minority Leader Alan Peter Cayetano ang alegasyon ni Senador Panfilo “Ping” Lacson nga may mga “ghost projects” sa Taguig kag ginhangkat ini nga magpagwa sang ebidensya agud pamatud-an ang iya akusasyon.
Suno kay Cayetano, makapila na ka beses nga ginsusi sang nagkalainlain nga ahensya sang gobyerno ang mga proyekto sa Taguig kag wala sang nakita nga ghost projects.
Ginpahayag man niya nga ang iya opisina nagpatigayon man sang kaugalingon nga beripikasyon kag padayon nga nagamonitor sang kahimtangan sang mga proyekto agud masiguro nga natapos ukon ginapadayon ang mga wala pa makompleto.
Ginpahayag pa sang senador nga ang “ghost project” amo ang proyekto nga nabayran na sang gobyerno apang wala man sang aktuwal nga nahimo ukon natukod.
Ginpanawagan niya ang Department of Public Works and Highways (DPWH) sa pagpanguna ni Secretary Vince Dizon nga idokumento kag kuhaan sang laragway ang tanan nga flood control projects agud mahibaluan kun may mga proyekto nga wala natuman.
Dugang pa niya, kun may mapamatud-ang ghost projects, kinahanglan nga mapanabat ang mga responsable bisan ano pa ang ila posisyon sa gobyerno.
Ginpabug-atan man ni Cayetano nga dapat indi lang sa Taguig magpokus ang imbestigasyon kundi lakip man sa iban nga mga siyudad kag probinsya nga nagaatubang sang seryoso nga problema sa pagbaha.
