Nagpasaka sang resolusyon ang mga hog raisers sa Esperanza, Sultan Kudarat nga nagapanawagan nga ipatuman ang P140 tubtob P150 kada kilo nga farmgate price sang buhi nga baboy, bangud sa padayon nga pagkalugi sang ila sektor.
Sa interview sang Bombo Radyo Koronadal ginpahayag ni Rosa Mae Taliga Edjan, vice president sang Esperanza Livestock Growers Association, nga ginpalab-ot na nila ang ila panawagan sa lokal kag provincial government, apang wala pa sang aksyon tubtob subong.
Ginpahayag ni Edjan nga yara na lamang sa P115 kada kilo ang presyo sang liveweight, nga nagresulta sa 60 tubtob 70 porsyento nga kalugian ukon P4,000 tubtob P5,000 nga lugi sa kada baboy. Nagumpisa ang pagnubo sang presyo sang Hunyo tubtob Hulyo, samtang nagapabilin nga mataas ang presyo sang feeds kag raw materials pareho sang mais kag upa.
Bangud sini, may mga hog raisers nga napilitan na nga ibaligya ang ila mga baboy apesar wala pa makabawi sa puhunan. Samtang, wala natigayon ang ila suhestyon nga P140-P150 nga farmgate price matapos nga wala magsugot ang Department of Trade and Industry (DTI).
Sa karon, nagahulat pa ang asosasyon sang sabat sang Sangguniang Panlalawigan matapos liwat nga ginpalab-ot ang ila panawagan paagi kay Board Member Maria Loida D. De Manuel, chairperson sang Committee on Agriculture, para sa posible nga bulig sa lokal nga hog-raising industry.













