Napulo na ka beses nga nga aktibo nga nagadonar sang dugo si Police Master Sergeant (PMSgt.) Teofilo Toledo sang South Cotabato PNP bilang paagi sang pagbulig kag pagluwas sang kabuhi sang mga nagakinahanglan.
Sa interview sang Bombo Radyo Koronadal, ginpahayag ni Toledo nga nasapwan niya ang importansya sang pagdonar sang dugo bangud dako ang mabulig sini sa mga pasyente nga nagakinahanglan sang blood transfusion.
Suno sa iya, nagsugod siya sa pagdonar sang dugo sang kolehiyo pa lamang siya kag halin sadto, nangin tradisyon na niya ang regular nga pagdonar.
Bangud sini, gin-awhag man ni Toledo ang publiko nga magdonar sang dugo kag magpakigbahin sa mga bloodletting activity bangud paagi sini, mahimo sila makabulig kag makaluwas sang kabuhi sang iban.
Kabahin sang iya pagpakigbahin ang Dugong Bombo 2026, nga nagahatag sang kahigayunan sa publiko kag nagkalainlain nga sektor nga magdonar sang dugo kag magbulig sa pagsiguro nga may bastante nga suplay sang dugo para sa mga nagakinahanglan sini.
