Nakahanda ang Cambodia nga mag-export sang bugas sa Pilipinas nga magagikan sa sobra sini bilang kabahin sang pagtinguha sang duha ka pungsod nga pabaskugon pa ang ila nga relasyon.
Suno sa Department of Foreign Affairs (DFA), ang promisa sang Phnom Penh ang nabatian sang mag-courtesy call si Philippine Ambassador to Cambodia Flerida Ann Camille Mayo kay Prime Minister Hun Manet sang Hulyo 16.
Suno pa sa ahensya, nakatutok ang ila nga pagsinapol sa mutual interest sang duha ka pungsod, lakip na ang economic partnerships, defense and security engagements, kag people-to-people ties.
Samtang, ginpahayag ni Mayo nga handa ang Pilipinas nga makig-angot sa Cambodia sa pagpatuman sang layi, partikular na sa paagu sang pagdihon sang standard arrangement para sa rescue kag repatriation sang mga Pilipino nga biktima sang human trafficking kag cyber scam operations sa sulod sang ginapatuman nga Memorandum of Understanding on Cooperation sa Pagpakigbato sa Transnational Crime.
