Nagapakita nga may nagkalain-lain nga paghangop sa mga probisyon sang Konstitusyon ang nagkalain-lain nga opinyon sang apat ka amici curiae parte sa 16-vote threshold sa impeachment trial.
Ini ang ginpahayag ni Atty. RJ Sustiguer, Presidente sang Integrated Bar of the Philippines South Cotabato-General Santos Chapter, sa interview sang Bombo Radyo Koronadal.
Suno kay Atty. Sustiguer, indi ini dapat tan-awon bilang problema kundi isa ka oportunidad nga mas mahangpan sang publiko ang mga probisyon sang Konstitusyon.
Madumduman nga tatlo sa apat ka amici curiae ang nagpahayag nga indi fixed ukon permanente ang 16 ka boto nga kinahanglan para sa conviction, samtang isa naman ang nagpahayag nga kinahanglan ang 16 ka boto suno sa Konstitusyon.
Suno pa kay Atty. Sustiguer, ang pinakaimportante amo ang pag-interpret kag pagpatuman sang Konstitusyon magbase sa kaayuhan sang katawhan kag sa patas nga proseso.
Ginpahayag man sang abogado nga ang pag-imbitar sang mga amici curiae naghatag sang dugang nga legal nga panan-aw nga makabulig sa publiko nga mahangpan ang isyu sang voting threshold.
Suno kay Atty. Sustiguer, yara na sa mga Pilipino ang paghangop kag pagpapaminsar sa mga legal nga panan-aw nga ginpresentar, ilabi na sa pagpangita sang kamatuoran kag sa pagpreserbar sang husto nga paghangop sa Konstitusyon.
