Ginaimbestigaran sang Bureau of Fire Protection (BFP) ang paggamit sang butane canister nga nakita malapit sa ginhalinan sang sunog sa isa ka balay sa Barangay GPS, Koronadal City, sang Agosto 23.
Sa interview sang Bombo Radyo Koronadal, ginpahayag ni SFO2 Alexander G. Alinsugay, Chief sang Intelligence and Investigation Unit sang BFP Koronadal, nga padayon pa ang pag-usisa sa physical kag testimonial evidence agud matumod ang aktuwal nga gintunaan sang kalayo.
Suno sa inisyal nga inspeksyon, nag-umpisa ang sunog sa kusina kag may nakita nga mga butane canister, lakip ang isa nga ginabulubanta may kapasidad nga 50 kilos.
Apang ginpahanumdom ni Alinsugay nga indi pa ini igo nga ebidensya agud makumpirmar nga butane ang gintunaan sang sunog.
Ginalantaw man nga ang mamag-an nga materyales sa kusina nakabulig sa madasig nga paglapta sang kalayo.
Samtang, ginabulubanta man sang BFP nga naglab-ot sa P590,000 ang kabug-usan nga kahalitan, lakip ang Kawasaki Bajaj nga tricycle.
Ginpasalamatan man sang BFP ang mga pumuluyo nga gilayon nagpangayo sang bulig kag nagbulig sa pagpugong kalayo sa paglapta.
Samtang, ginpaandam ang publiko nga indi pagpabay-an ang butane samtang ginagamit kag siguruhon nga husto kag luwas ang paggamit sini agud malikawan ang sunog.
