KORONADAL CITY- Nakilala na ang bangkay sang lalaki nga naka-duct tape ang nawong nga nasapwan sa Purok Sto. Niño, Brgy. Simsiman, Norala, South Cotabato sang Biyernes, Pebrero 23,2024.
Suno kay Norala Municipal Councilor Roy Fusingan, positibo nga ginkilala sang iya pamilya ang bangkay sang lalaki nga si Basit Lamalan Abdullah, 26 anyos, mangunguma kag residente sang Datu Abdullah, Sangki, Maguindanao del Sur.
Ginpadulungan mismo sang pamilya sini sa Emerald Funeral Parlor sa banwa sang Norala ang bangkay sang lalaki kag gindala na pauli sa ila puluy-an pasado alas-9 subong nga gab-i.
Wala pa man mahibaluan kun ano ang motibo sa pagpatay sa biktima kag kun sin-o ang may kahimuan sang krimen.
Madumduman nga naglab-ot sa walo ka buno sang patalom ang naangkon sang biktima sa nagkalainlain nga bahin sang iya lawas nga gintunaan sang kamatayon sini.
