Naghatag liwat sang health update ang komedyante nga si Ate Gay matapos makitaan sang bag-o nga bukol sa idalom sang iya liog malapit sa abaga, samtang padayon ang iya pagpakig-away batok sa stage 4 cancer ukon mucoepidermoid carcinoma.
Ginpahayag ni Ate Gay nga gilayon nga gin-aksyonan sang iya medical team ang kondisyon kag nagpaidalom siya sa CyberKnife treatment, isa ka non-invasive nga radiation therapy para sa mga tumor.
Bisan pa sa panibag-o nga pagtilaw sa iya panglawas, nagpabilin siya nga positibo kag nagpahayag nga ginatugutan siya sang iya mga doktor nga magpadayon sa pagperform.
Nagpasalamat man siya sa iya mga doktor kag sa padayon nga suporta kag pag-ampo sang iya mga fans.
Madumduman nga sang Hunyo 29, gin-anunsyar ni Ate Gay nga nadula na ang mga bukol sa iya ilong kag liog base sa resulta sang MRI.
Una niya ginpahibalo ang publiko nga may stage 4 cancer siya sa isa ka interbyu sang Setyembre 2025.
