Napaslawan ang handum sang Alas Pilipinas nga makasulod sa semifinals sang 2026 AVC Women’s Cup matapos mapierde sang Chinese Taipei sa tatlo ka as0d-asod nga set, 16-25, 14-25 kag 10-25, sa Pool A sang torneo nga ginhiwat sa Candon City Arena.
Bangud sang kapierdehan, opisyal nga nagtakop ang kampanya sang national women’s volleyball team para sa Final Four kag naputol man ang asod-asod nila nga pag-angkon sang pwesto sa podium matapos makuha ang bronze medal sang 2024 kag silver medal sang nagligad nga tuig sang ginatawag pa ang torneo nga AVC Nations Cup.
Sa pihak sang kapierdehan, may kahigayunan pa ang Pilipinas nga makigkompetensya para sa ika-lima nga pwesto kun matapos ini sa ikatatlo nga pwesto sang Pool A antes ang classification phase.
Ginpahayag ni Alas Pilipinas interim head coach pinakadako nga rason sang resulta amo ang kakulangan sang panahon para sa preparasyon sang hubon.
Suno sa iya, dako ang epekto sang limitado nga preparasyon sa performance sang team, apang ginpabutyag niya nga padayon ang ila paglaum para sa mas maayo nga palaabuton sang volleyball sa Pilipinas.
Wala sang players sang Alas Pilipinas nga nakaabot sa doble-digit nga puntos, sa diin nanguna si Alyssa Solomon nga may anum ka puntos.
Nagdugang naman sang tig-tatlo ka puntos sanday Ces Molina kag Niña Ytang.
Sa bahin sang Chinese Taipei, nanguna sa scoring si Hsu Wan-Yun nga may 13 puntos, samtang nag-amot man si Chang Yi-Chi sang 13 puntos.
Nagpakita man sang mabakod nga depensa si Chen Ciao-En matapos makarekord sang anum ka blocks para sa kabug-usan nga 12 puntos.
Sa resulta, ginpabakod sang Chinese Taipei ang ila malimpyo nga 4-0 rekord kag nakasiguro na sang pwesto sa semifinals.
Matapos ang pool play, nagtapos ang Alas Pilipinas nga may 2-3 rekord kag nagahulat na lamang sang katapusan nga resulta sang Pool A action sa Biyernes para sa madason nga lebel sang kompetisyon.
