Siyam na lamang sa 22 ka barangay sa Koronadal City ang nakapabilin sa drug-cleared status subong nga 2026, samtang 13 ka barangay ang may yara sang Certified Inventory of Drug Personalities (CIDP) nga padayon nga ginatutukan sang City Anti-Drug Abuse Council (CADAC), upod ang PNP kag PDEA.
Sa interview sang Bombo Radyo Koronadal ginpahayag ni Jerome Atangan, focal point specialist kag administrative officer sang CADAC, padayon ang ila intervention programs, information drives kag lectures sa mga barangay kag buluthuan agud mapataas ang kaalam sang publiko, ilabi na sang mga kabataan, nahangunod sa peligro sang paggamit sang iligal nga droga. Ginpahayag man ni Atangan nga isa sa mga pagtilaw sang Syudad sang Koronadal amo ang pag-agi sini bilang drop-off point sang iligal nga droga halin sa iban nga rehiyon.
Apang, madamo sa mga illegal drug shipments ang gina-intercept na karon sang mga otoridad sa dalan paagi sa monitoring kag operasyon. Samtang, lima ka barangay ang wala pa nakakompleto sang proseso sang drug clearing bangud nagahulat pa sang Certificate of No Active Drug Personality halin sa national level sang PDEA, apesar kompleto na ang ila mga dokumento kag requirements kag aktibo sa kampanya kontra droga.
Sa una nga 22 ka barangay nga nakakuha sang drug-cleared status, lakip ang Barangay Assumption nga nakabaton sang drug-free classification. Gin-athag man ni Atangan nga indi permanente ang drug-cleared status bangud mahimo liwat makarekord sang drug-affected individuals ang isa ka barangay.
Gani, importante ang padayon nga koordinasyon sang CADAC, PNP, PDEA, mga opisyal sang barangay kag Barangay Anti-Drug Abuse Councils (BADAC) agud mapunggan ang pagbalik sang problema sa iligal nga droga sa komunidad.













